Bunge la Tanzania

Spika wa Bunge la Tanzania, Mhe. Mussa Azzan Zungu amehutubia Mkutano Mkuu wa 153 wa Umoja wa Mabunge Duniani (IPU) jijini Arusha na kusisitiza kwamba dunia inapaswa kushirikiana katika kutatua changamoto zinazojitokeza kwa kuwa hakuna upande unaoweza kufanikiwa bila upande mwingine.

Akizungumza mbele ya Masipika na Wabunge zaidi ya 1,500 kutoka duniani kote, Mheshimiwa Spika amesema kupitia mabunge, tofauti zinaweza kubadilishwa kwa mazungumzo na maslahi yanayopingana yanapatanishwa kupitia hoja.

“Sisi ni mahali ambapo tofauti zinabadilishwa kwa mazungumzo, maslahi yanayopingana yanapatanishwa kupitia hoja na utu wa kila binadamu unalindwa,hatushughulikii kesho tofauti.

“Tuna ubinadamu mmoja na hatima ya pamoja. Hatuna tatizo la Kusini mwa Dunia au tatizo la Kaskazini mwa Dunia. Tuna tatizo la kibinadamu. Na linahitaji suluhisho la kibinadamu. Kaskazini ina teknolojia na mtaji, Kusini ina rasilimali, vijana, na ustahimilivu. Hakuna upande unaoweza kufanikiwa bila mwingine,” amesema.

Amesema dunia ya kesho inahitaji lugha ya ushirikiano na ubunifu badala ya lugha ya utegemezi na hisani chini ya chombo kimoja cha kibunge.

“Hakuna dunia mbili ya nchi zilizoendelea na zinazoendelea, kwa miongo mingi msamiati wetu wa kimataifa umeundwa na maneno kama vile wafadhili na wapokeaji, walioendelea na wanaoendelea, misaada na usaidizi.

“Lugha kama hii inaweza kuelezea vipengele vya historia yetu, lakini haielezei ipasavyo dunia tunayoingia. Dunia inahitaji madini muhimu na madini adimu kutengeneza betri, teknolojia za nishati mbadala, magari ya umeme, vifaa vya elektroniki vya hali ya juu na teknolojia nyingine muhimu kwa mustakabali wa uchumi wetu.

“Sisi si dunia mbili, sisi ni dunia moja inayojaribu kujenga mustakabali mmoja kwa wanadamu. Madini adimu yaliyo chini ya Afrika na Amerika ya Kusini yanaweza kuendesha mustakabali wa kijani unaobuniwa Ulaya na Amerika. Vijana wa Kusini wanaweza kuendesha uchumi  wa Kaskazini,” amesisitiza.

Amesema mustakabali wa dunia haupaswi kuwa mustakabali ambapo Kusini inatoa rasilimali wakati Kaskazini inanasa sehemu kubwa ya maarifa, teknolojia na thamani na kwamba jibu si kufunga milango kwa uwekezaji na ushirikiano wa kimataifa.

“Jibu ni ushirikiano ili uwekezaji ulete mtaji na teknolojia, elimu ilete ujuzi, ushiriki wa ndani ulete ajira na ubunifu ulete thamani.

“Tunapokutana hapa kwa Mkutano wa 153, nawahimiza sote Kaskazini mwa Dunia na Kusini mwa Dunia tufanye kazi pamoja kwa ajili ya ubinadamu mmoja na hatima ya pamoja. Tuondoke Arusha tukiwa tumechagua ushirikiano badala ya utegemezi, mshikamano badala ya mgawanyiko na ustawi wa pamoja badala ya fursa zisizo sawa,” amesema.

Mkutano wa 153 wa IPU unafanyika katika Ukumbi wa Mikutano wa Kimataifa (AICC) jijini Arusha ambapo Kaulimbiu ya Mkutano huo ni "Kuimarisha Utawala Bora, Kupitia Ushirikishwaji, Imani na Fursa kwa Wote”.

TANZANIA IMEIMARISHA UTAWALA BORA

Akizungumzia masuala ya Utawala Bora, Spika wa Bunge amesema Mkutano wa 153 wa Umoja wa Mabunge Duniani (IPU) unafanyika wakati Tanzania ikiwa imefanya juhudi kubwa kujenga utawala bora, Imani ya jamii na fursa jumuishi za kijamii na kiuchumi.

Mheshimiwa Spika amesema katika kipindi hiki, Tanzania imeshuhudia mageuzi ya kisiasa na maridhiano ambapo Serikali chini ya Mheshimiwa Rais Dkt. Samia Suluhu Hassan iliendeleza falsafa ya 4R (Maridhiano, Ustahimilivu, Mageuzi, na Kujenga Upya).

Amesema falsafa hiyo imetoa kipaumbele kikubwa katika masuala ya haki za binadamu, demokrasia na utawala jumuishi.

“Kufuatia mageuzi haya, Bunge la Tanzania lilipitisha sheria kadhaa za mageuzi ya kisiasa, ikiwemo Sheria ya Tume ya Taifa ya Uchaguzi, Sheria ya Uchaguzi wa Rais, Wabunge na Serikali za Mitaa na Sheria ya Marekebisho ya Sheria ya Vyama vya Siasa.

“Sheria hizi zinalenga kuhakikisha michakato ya uchaguzi iliyo huru, yenye uwazi na inayoaminika zaidi,” amesema.

Aidha, ameeleza kuwa utawala bora unategemea ujumuishi na uwezeshaji, jambo ambalo Bunge la Tanzania limefanikiwa kutekeleza mifumo ya kikatiba na kisheria inayoongeza uwakilishi wa wanawake Bungeni na katika Serikali za Mitaa.

“Sheria ya Vyama vya Siasa sasa inaelekeza wazi ujumuishaji wa makundi ya kijamii (vijana, wanawake na watu wenye ulemavu) ndani ya miundo ya ndani ya vyama na uteuzi wa wagombea.

“Tunajivunia kuwa uwakilishi wa wanawake katika Bunge letu umekuwa ukiongezeka kwa muda hadi kufikia 39.5% kwa sasa,” amesema.