Parliament of Tanzania

Date	Session	Sitting
17 June 2010	20	9

Hon Mohamed, Hamad Rashid[CUF]

Mheshimiwa Mwenyekiti, nakushukuru. Naomba kumwuliza Mheshimiwa Waziri Mkuu kwamba Sera ya Ubinafsishaji madhumuni yake makubwa ilikuwa ni kuongeza pato, ajira na ufanisi. Shamba la Kapunga Mbarali lenye hekta 5,500 lilibinafsishwa na aliyepewa analima hekta 100 tu kati ya 5,500. Je, huu ni utekelezaji sahihi wa sera ya ubinafsishaji?

Answer From Prime Minister

Mheshimiwa Mwenyekiti, naomba kumjibu Mheshimiwa Hamad Rashid Mohamed, swali lake kama ifuatavyo:-

Ni kweli kwamba tunaye mwekezaji pale Mbarali kwenye shamba la Kapunga na anaendelea kupanua lile shamba kadri ya uwezo alivyokuwa ameupanga. Kwa hiyo, mimi nadhani kubwa pale ambalo wote tunatakiwa kulijua na kulifuatilia kama Watanzania ni kuona ni kwa kiwango gani ameweza kutimiza yale ambayo tulikuwa tumekubaliana kwenye mkataba wetu.

Sasa nadhani katika hali kama hiyo utakuta pengine ndiyo hali iliyopo kwenye maeneo mengi. Hajaondoka, hajahama kwa hiyo, mimi nadhani ni vizuri tukakubali kwamba jitihada zipo anaweza kuwa na mapungufu ya hapa na pale.

Hon Mohamed, Hamad Rashid[CUF]

Mheshimiwa Mwenyekiti, Mheshimiwa Rais alikwenda Mbarali na akapata kuonana na wananchi wakilalamika kwamba mwekezaji huyu mbali tu na kwamba alikuwa amewazuia hata mifereji ya kumwagilia maji katika mashamba yao, lakini vile vile anawakodisha kwa shilingi milioni moja kwa hekta moja na wakamwomba Rais kwamba shamba hili lichukuliwe lirudishwe kwa wananchi.

Je, kitendo cha kumwachia Mwekezaji afanye hivyo na huku tuna sera ya MKURUBITA ambayo inataka kuwarasimisha wananchi. Je, hatuoni kwamba Serikali inakwenda kinyume na sera hiyo ya MKURUBITA?

Answer From Prime Minister

Mheshimiwa Mwenyekiti, of course ni jambo kidogo gumu kwa sababu ni mambo yetu ya kisheria kwa namna tulivyoingia mikataba. Unachokiona pale kwamba baada ya ubinafsishaji ule, shamba lile ni mali yake na ni jukumu lake kuliendeleza. Sasa kama wako Watanzania ambao kwa mpango ulivyo wanaona wanachelewa na wanakubali kukodishwa ili shamba lile liweze kutumika kwa ufanisi zaidi, hilo ni jambo jingine. Lakini tungependa tunachoweza kufanya ni kufuatilia kuona mpango wenyewe hasa umefikia hatua gani kulingana na makubaliana tuliyokuwa tumewekeana.

Hon Killimbah, Juma Hassan[CCM]

Mheshimiwa Mwenyekiti, ahsante sana. Takribani miaka 2 iliyopita Serikali ilitueleza juu ya dhamira yake ya kuanzisha Mtandao wa Serikali (E-Government) na hii ilikuwa ni dhamira nzuri kwa nia ya kuiunganisha Serikali na kuboresha utendaji wake.

Je, ni kwa kiwango gani baada ya mfumo huo kuanzishwa umefanyakazi na umeweza kuinufaisha Serikali katika kipindi hiki cha miaka miwili?

Kama mfumo huu umeunganisha Serikali na imefanya kazi vizuri ni kwa nini baadhi ya watendaji wa Serikali bado kuna migongano katika maelezo ambayo yanatokana na utendaji wake?

Answer From Prime Minister

Mheshimiwa Mwenyekiti, naomba nijaribu kumjibu Mheshimiwa Killimbah, swali lake kama ifuatavyo:-

Kwanza nikuombe tu radhi kwa sababu ni jambo ambalo kidogo lina utalaam ndani na sina undani sana wa wapi jambo hili limefikia ili tuweze kukupa jibu ambalo ni sahihi zaidi. Lakini, ninachoweza kusema tu ni kwamba ni kweli kwamba Serikali tulianzisha mradi huo na Idara Kuu ya Utumishi chini ya Ofisi ya Rais, ndio wanaosimamia eneo hilo. Utaratibu umekwishaanza na unaendelea, sasa sidhani kama baada ya kuanzishwa basi mara moja migongano yote ya upatikanaji wa taarifa itapatikana kwa sababu inategemea watumiaji wanavyotumia facility hiyo ni kwa kiasi gani. Lakini inawezekana lisiwe kamilifu sana pengine nitamwomba Dada yangu Hawa Ghasia akipata muda aweze kuzungumza na wewe ili akupe hasa mambo yalivyo kwa hivi sasa ili uweze kuridhika.

Records 1 to 3 of 9

Last